ᱱᱟᱛᱷᱟᱱᱤᱭᱮᱞ ᱢᱩᱨᱢᱩ
(᱐᱓/᱐᱙/᱑᱙᱒᱖ ᱼ ᱒᱕/᱑᱐/᱑᱙᱘᱙)
ᱥᱟᱱᱛᱟᱞᱤ ᱥᱟᱶᱦᱮᱸᱫᱨᱮᱱ ᱧᱩᱛᱩᱢᱟᱱ ᱥᱟᱥᱟᱯᱟᱲᱟᱣᱤᱡ, ᱜᱟᱢᱟᱢᱤᱭᱟᱹ, ᱠᱟᱹᱦᱟᱱᱤᱭᱟᱹ ᱟᱨ ᱥᱟᱱᱛᱟᱞ ᱥᱳᱢᱟᱡᱽᱨᱮᱱ ᱢᱟᱨᱟᱝ ᱟᱹᱜᱭᱩᱨᱤᱡ ᱢᱟᱱ ᱱᱟᱛᱷᱟᱱᱤᱭᱮᱞ ᱢᱩᱨᱢᱩᱣᱟᱜ ᱟᱨᱮ ᱜᱮᱞ ᱢᱚᱬᱮᱸᱭᱟᱜ ᱡᱟᱱᱟᱢ ᱵᱟᱹᱪᱷᱲᱤᱠᱟᱱᱛᱟᱭᱟ ᱾ ᱩᱱᱤᱭᱟᱜ ᱱᱳᱣᱟ ᱡᱟᱱᱟᱢ ᱵᱟᱹᱪᱷᱲᱤᱨᱮ ᱥᱟᱭ ᱥᱟᱭ ᱡᱚᱦᱟᱨ ᱟᱨ ᱢᱟᱱᱚᱛ ᱟᱯᱟᱱᱡᱽᱞᱮ᱾
ᱥᱟᱱᱛᱟᱞᱤ ᱥᱟᱶᱦᱮᱸᱫᱨᱮᱱ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ, ᱠᱟᱹᱦᱱᱤᱭᱟᱹ, ᱜᱟᱢᱟᱢᱤᱭᱟᱹ, ᱥᱟᱥᱟᱯᱟᱲᱟᱣᱤᱡ ᱟᱨ ᱨᱟᱡᱟᱹᱨᱤ ᱟᱹᱜᱭᱩᱨᱤᱡ ᱢᱟᱱ ᱱᱟᱛᱷᱟᱱᱤᱭᱮᱞ ᱢᱩᱨᱢᱩ ᱫᱚ ᱛᱮᱹᱦᱮᱹᱧᱟᱜ ᱛᱟᱹᱨᱤᱠ ᱐᱓ ᱥᱮᱯᱴᱮᱢᱵᱟᱹᱨ ᱑᱙᱒᱖ ᱥᱟᱞᱨᱮ ᱫᱩᱞᱟᱹᱲᱤᱭᱟᱹ ᱮᱝᱜᱟᱛ ᱱᱟᱥᱳ ᱥᱚᱨᱮᱱᱟᱜ ᱠᱩᱠᱷᱤ ᱠᱷᱚᱱ ᱦᱚᱥᱚᱨᱠᱟᱛᱮ ᱱᱳᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮᱭᱟᱜ ᱯᱟᱹᱦᱤᱞ ᱢᱟᱨᱥᱟᱞ ᱫᱚᱭ ᱧᱮᱞᱞᱮᱫᱟ ᱾ ᱟᱡᱨᱮᱱ ᱟᱯᱟᱛᱟᱜ ᱧᱩᱛᱩᱢ ᱫᱚ ᱠᱳᱨᱱᱮᱞᱤᱣᱥ ᱢᱩᱨᱢᱩ ᱠᱟᱱᱛᱟᱭᱟ ᱾ ᱩᱱᱤᱭᱟᱜ ᱡᱟᱱᱟᱢ ᱟᱛᱳ ᱨᱮᱭᱟᱜ ᱧᱩᱛᱩᱢ ᱫᱚ ᱯᱟᱹᱪᱷᱤᱢ ᱵᱟᱝᱜᱽᱞᱟ ᱨᱟᱡᱽᱨᱮ ᱢᱮᱱᱟᱜ ᱵᱟᱞᱩᱨᱜᱷᱟᱴ ᱥᱩᱵᱽ ᱫᱤᱣᱤᱥᱤᱭᱳᱱ, ᱦᱤᱞᱤ ᱛᱷᱟᱱᱟ ᱛᱟᱹᱨᱤ ᱨᱮᱭᱟᱜ ᱱᱟᱨᱟᱭᱟᱱᱯᱩᱨ ᱠᱟᱱᱛᱟᱭᱟ ᱾ ᱟᱡ ᱵᱟᱵᱟ ᱫᱚ ᱱᱟᱨᱟᱭᱟᱱᱯᱩᱨ ᱢᱤᱥᱟᱹᱱ ᱤᱥᱠᱩᱞᱨᱮᱱ ᱪᱮᱪᱮᱫ ᱢᱟᱦᱟᱥᱚᱭᱮ ᱛᱟᱦᱮᱸᱠᱟᱱᱟ ᱾
ᱮᱛᱚᱦᱚᱵ ᱥᱤᱠᱷᱱᱟᱹᱛ:ᱼ
ᱢᱟᱱ ᱱᱟᱛᱷᱟᱱᱤᱭᱮᱞ ᱢᱩᱨᱢᱩᱣᱟᱜ ᱮᱛᱚᱦᱚᱵ ᱥᱤᱠᱷᱱᱟᱹᱛ ᱫᱚ ᱱᱟᱨᱟᱭᱟᱱᱯᱩᱨ ᱢᱤᱥᱟᱹᱱ ᱥᱠᱩᱞ ᱠᱷᱚᱱ ᱮᱦᱚᱵᱞᱮᱱᱛᱟᱭᱟ ᱾ ᱟᱡᱨᱮᱱ ᱟᱯᱟᱫᱛᱮᱫ ᱤᱥᱠᱩᱞ ᱢᱟᱦᱟᱥᱚᱭᱮ ᱛᱟᱦᱮᱸᱠᱟᱱᱛᱮ ᱠᱟᱹᱴᱤᱡ ᱩᱢᱮᱨ ᱠᱷᱚᱱᱜᱮ ᱯᱩᱛᱷᱤ ᱥᱟᱶ ᱳᱯᱨᱳᱢ ᱫᱚ ᱦᱳᱭᱞᱮᱱᱛᱟᱭᱟ᱾ ᱩᱱᱤ ᱫᱚ ᱟᱹᱰᱤ ᱞᱟᱥᱮᱨ ᱦᱟᱛᱟᱝᱟᱹᱱᱤᱡᱼᱮ ᱛᱟᱦᱮᱸᱠᱟᱱᱟ ᱾ ᱳᱱᱟ ᱞᱮᱠᱟᱛᱮ ᱩᱱᱤ ᱫᱚ ᱮᱴᱟᱜ ᱜᱤᱫᱽᱨᱟᱹᱠᱳ ᱠᱷᱚᱱ ᱯᱟᱲᱟᱣᱜᱨᱮ ᱟᱹᱰᱤ ᱛᱟᱹᱯᱤᱥᱮ ᱛᱟᱦᱮᱸᱠᱟᱱᱟ ᱾ ᱱᱟᱨᱟᱭᱟᱱᱯᱩᱨ ᱢᱤᱥᱟᱹᱱ ᱥᱠᱩᱞ ᱠᱷᱚᱱ ᱯᱟᱥ ᱳᱰᱳᱝᱠᱟᱛᱮ ᱩᱱᱤ ᱫᱚ ᱵᱟᱞᱩᱨᱜᱷᱟᱴ ᱦᱟᱭ ᱥᱠᱩᱞ ᱨᱮᱠᱳ ᱵᱷᱩᱨᱛᱤᱠᱮᱫᱮᱭᱟ ᱾ ᱚᱱᱰᱮ ᱢᱤᱫ ᱵᱚᱪᱷᱚᱨ ᱯᱟᱲᱦᱟᱣᱠᱟᱛᱮ ᱪᱮᱠᱟᱛᱮ ᱪᱚ ᱳᱱᱟ ᱤᱥᱠᱩᱞᱨᱮ ᱢᱚᱱᱮ ᱵᱟᱝ ᱞᱟᱜᱟᱣᱞᱮᱱᱛᱟᱭᱛᱮ ᱠᱳᱣᱪᱵᱮᱦᱟᱨᱨᱮ ᱢᱮᱱᱟᱜ ᱢᱟᱱᱤᱱᱫᱽᱨᱟ ᱦᱟᱭ ᱥᱠᱩᱞ ᱨᱮᱠᱳ ᱩᱪᱟᱹᱲᱠᱮᱫᱮᱭᱟ ᱾ ᱳᱱᱟ ᱤᱥᱠᱩᱞ ᱠᱷᱚᱱᱜᱮ ᱩᱱᱤ ᱫᱚ ᱑᱙᱔᱖ ᱥᱟᱞᱨᱮ ᱢᱮᱢᱨᱤᱠ ᱨᱮᱭᱟᱜ ᱵᱤᱰᱟᱹᱣ ᱫᱚᱭ ᱯᱟᱥᱞᱮᱫᱟ ᱾ ᱢᱮᱴᱨᱤᱠ ᱯᱟᱥᱠᱮᱫ ᱛᱟᱭᱚᱢ ᱟᱫᱚ ᱪᱮᱫᱠᱳ ᱠᱷᱟᱹᱛᱤᱨᱛᱮ ᱪᱚ ᱞᱟᱦᱟᱥᱮᱡ ᱯᱟᱲᱦᱟᱣ ᱫᱚᱭ ᱵᱟᱹᱜᱤᱠᱮᱫᱟ ᱟᱨ ᱱᱳᱝᱠᱟ ᱞᱮᱠᱟᱛᱮ ᱯᱟᱲᱦᱟᱣᱜ ᱡᱤᱭᱳᱱ ᱫᱚ ᱢᱩᱪᱟᱹᱫᱼᱮᱱᱛᱟᱭᱟ᱾
ᱪᱟᱹᱠᱨᱤ ᱡᱤᱭᱳᱱ:ᱼ
ᱢᱟᱱ ᱱᱟᱛᱷᱟᱱᱤᱭᱮᱞ ᱢᱩᱨᱢᱩ ᱫᱚ ᱯᱟᱲᱦᱟᱣᱜᱼᱮ ᱵᱟᱹᱜᱤᱠᱮᱫᱠᱷᱟᱱ ᱟᱡᱼᱟᱜ ᱵᱩᱠᱟᱹ ᱛᱳᱯᱟᱨᱮ ᱢᱮᱱᱟᱜ ᱤᱥᱠᱩᱞᱨᱮ ᱪᱮᱪᱮᱫ ᱢᱟᱦᱟᱥᱚᱭ ᱞᱮᱠᱟᱛᱮ ᱠᱟᱹᱢᱤᱭ ᱮᱦᱚᱵᱠᱮᱫᱟ ᱾ ᱱᱟᱨᱟᱭᱟᱱᱯᱩᱨ ᱤᱥᱠᱩᱞᱨᱮ ᱵᱟᱨ ᱥᱮᱨᱢᱟ ᱦᱟᱹᱵᱤᱡ ᱠᱟᱹᱢᱤᱠᱟᱛᱮ ᱳᱱᱟ ᱠᱟᱹᱢᱤ ᱦᱚᱸᱭ ᱵᱟᱹᱜᱤᱭᱟᱫᱟ ᱾ ᱪᱟᱹᱠᱨᱤ ᱠᱟᱹᱢᱤ ᱵᱟᱹᱜᱤᱭᱟᱜ ᱨᱮᱭᱟᱜ ᱟᱥᱚᱞ ᱠᱟᱨᱚᱱ ᱫᱚ ᱱᱳᱣᱟᱜᱮ ᱛᱟᱦᱮᱸᱠᱟᱱᱟ ᱡᱮ ᱩᱱᱤ ᱫᱚ ᱥᱳᱢᱟᱡᱽ ᱥᱩᱥᱟᱹᱨ ᱠᱟᱹᱢᱤᱭ ᱢᱮᱱᱡᱚᱝᱠᱟᱱ ᱛᱟᱦᱮᱸᱠᱟᱱᱟ ᱾ ᱩᱱᱤ ᱫᱚ ᱡᱟᱣᱜᱮ ᱥᱟᱱᱛᱟᱞ ᱟᱹᱫᱤᱣᱟᱹᱥᱤᱠᱳᱣᱟᱜ ᱱᱟᱪᱟᱨ ᱦᱟᱞᱚᱛ ᱧᱮᱞᱛᱮ ᱟᱹᱰᱤ ᱵᱷᱟᱵᱽᱱᱟᱭ ᱟᱹᱭᱠᱟᱹᱣᱮᱫ ᱛᱟᱦᱮᱸᱠᱟᱱᱟ ᱾ ᱦᱚᱲᱠᱳ ᱫᱚ ᱡᱟᱣᱜᱮ ᱮᱴᱟᱜ ᱡᱟᱹᱛᱴᱷᱮᱱᱠᱳ ᱮᱲᱮ ᱞᱤᱯᱩᱜ ᱟᱨᱠᱳ ᱥᱟᱱᱛᱟᱣ ᱳᱪᱳᱜᱠᱟᱱ ᱛᱟᱦᱮᱸᱠᱟᱱᱟ ᱾ ᱱᱩᱠᱨᱤ ᱠᱟᱹᱢᱤᱨᱮ ᱛᱟᱦᱮᱸᱠᱟᱛᱮ ᱯᱟᱥᱮᱡ ᱳᱱᱠᱳ ᱳᱣᱟᱨ ᱟᱨ ᱟᱹᱜᱭᱩᱨᱠᱳ ᱫᱚ ᱢᱚᱦᱚᱧᱡᱚᱨᱜᱮ ᱛᱟᱦᱮᱸᱠᱟᱱᱟ ᱾ ᱳᱱᱟ ᱞᱮᱠᱟᱨᱮ ᱩᱱᱤ ᱫᱚ ᱟᱯᱱᱟᱨ ᱡᱟᱹᱛᱨᱮᱱ ᱦᱚᱲ ᱫᱚᱜᱠᱳ ᱞᱟᱹᱜᱤᱫᱛᱮ ᱪᱮᱪᱮᱫ ᱢᱟᱦᱟᱥᱚᱭ ᱠᱟᱹᱢᱤ ᱵᱟᱹᱜᱤᱠᱟᱛᱮ ᱥᱳᱢᱟᱡᱽ ᱥᱩᱥᱟᱹᱨ ᱠᱟᱹᱢᱤᱨᱮᱭ ᱫᱚᱱ ᱠᱷᱟᱫᱽᱞᱮᱭᱮᱱᱟ, ᱡᱮᱢᱚᱱ ᱥᱩᱥᱟᱹᱨ ᱠᱟᱹᱢᱤᱨᱮ ᱰᱷᱮᱨ ᱥᱚᱢᱚᱭᱮ ᱮᱢ ᱫᱟᱲᱮᱭᱟᱜ ᱟᱨ ᱜᱳᱴᱟ ᱢᱚᱱᱮᱛᱮ ᱳᱱᱠᱳᱭ ᱜᱚᱲᱳ ᱫᱟᱲᱮᱭᱟᱠᱳ ᱾ ᱩᱱᱤᱭ ᱵᱟᱰᱟᱭ ᱛᱤᱭᱳᱜᱠᱮᱫᱟ ᱡᱮ ᱦᱚᱲ ᱵᱷᱟᱹᱜᱞᱟᱹᱭᱠᱳ ᱞᱟᱹᱜᱤᱫ ᱨᱟᱡᱟᱹᱨᱤ ᱫᱚᱞ ᱥᱟᱶ ᱡᱳᱲᱟᱣ ᱫᱚ ᱟᱹᱰᱤ ᱡᱟᱹᱨᱩᱲᱜᱮᱭᱟ ᱾ ᱮᱱᱛᱮ ᱨᱟᱡᱟᱹᱨᱤ ᱫᱚᱞᱨᱮ ᱫᱚ ᱦᱚᱲᱠᱳ ᱩᱯᱠᱟᱹᱨᱠᱳ ᱞᱟᱹᱜᱤᱫ ᱟᱭᱢᱟ ᱟᱹᱛ ᱚᱯᱥᱚᱨ ᱟᱨ ᱫᱟᱲᱮ ᱢᱮᱱᱟᱜᱼᱟ ᱾
ᱨᱟᱡᱟᱹᱨᱤ ᱡᱤᱭᱳᱱ:ᱼ
ᱪᱮᱪᱮᱫ ᱢᱟᱦᱟᱥᱚᱭ ᱨᱮᱭᱟᱜ ᱠᱟᱹᱢᱤ ᱵᱟᱹᱜᱤᱠᱟᱛᱮ ᱢᱟᱱ ᱱᱟᱛᱷᱟᱱᱤᱭᱞ ᱢᱩᱨᱢᱩ ᱫᱚ ᱨᱤᱣᱳᱞᱭᱩᱥᱱᱟᱹᱨᱤ ᱥᱳᱥᱞᱤᱥᱴ ᱯᱟᱨᱴᱤ (ᱨᱥᱯ) ᱨᱮᱱ ᱨᱟᱹᱥᱤᱟᱹᱭ ᱵᱮᱱᱟᱣᱮᱱᱟ ᱾ ᱨᱥᱯ ᱨᱮᱱ ᱨᱟᱹᱥᱤᱭᱟᱹᱛᱮᱫ ᱦᱟᱛᱟᱣᱠᱟᱛᱮ ᱩᱱᱤ ᱫᱚ ᱟᱹᱰᱤ ᱡᱷᱩᱸᱠ ᱟᱨ ᱞᱚᱞᱚ ᱢᱚᱱᱮ ᱥᱟᱞᱟᱜ ᱠᱟᱹᱢᱤ ᱮᱦᱚᱵᱠᱮᱫᱟ ᱾ ᱩᱱᱤ ᱫᱚ ᱡᱟᱣᱜᱮ ᱦᱚᱲᱠᱳ ᱟᱠᱳᱣᱟᱜ ᱦᱚᱠ ᱟᱹᱭᱫᱟᱹᱨᱤ ᱵᱟᱵᱚᱛᱛᱮᱭ ᱞᱟᱹᱭᱟᱠᱳᱠᱟᱱ ᱛᱟᱦᱮᱸᱠᱟᱱᱟ ᱟᱨ ᱳᱱᱠᱳᱣᱟᱜ ᱢᱤᱢᱤᱫ ᱢᱩᱥᱠᱤᱞ ᱠᱟᱹᱢᱤ ᱥᱟᱹᱨᱤᱭᱟᱹᱣ ᱞᱟᱹᱜᱤᱫᱼᱮ ᱜᱚᱲᱚᱣᱟᱠᱳᱠᱟᱱ ᱛᱟᱦᱮᱸᱠᱟᱱᱟ ᱾ ᱮᱛᱚᱦᱚᱵ ᱠᱷᱚᱱᱜᱮ ᱱᱳᱣᱟ ᱠᱟᱹᱢᱤᱨᱮ ᱟᱹᱰᱤ ᱢᱚᱱᱮ ᱛᱟᱦᱮᱸᱠᱟᱱᱛᱟᱭᱛᱮ ᱱᱳᱣᱟ ᱠᱟᱹᱢᱤᱨᱮ ᱟᱹᱰᱤ ᱢᱚᱱᱮ ᱞᱟᱜᱟᱣᱮᱱᱛᱟᱭᱟ ᱟᱨ ᱟᱹᱰᱤ ᱨᱤᱠᱤᱲ ᱛᱩᱞᱩᱡ ᱠᱟᱹᱢᱤ ᱮᱦᱚᱵᱠᱮᱫᱟ ᱾ ᱦᱚᱲ ᱦᱚᱯᱚᱱᱠᱳ ᱢᱩᱥᱠᱤᱞ ᱠᱷᱚᱱ ᱳᱣᱟᱨᱠᱳ ᱟᱨ ᱳᱱᱠᱳᱣᱟᱜ ᱦᱚᱠ ᱧᱟᱢ ᱳᱪᱳᱠᱳᱨᱮ ᱥᱤᱧ ᱧᱤᱱᱫᱟᱹᱭ ᱢᱤᱫᱠᱮᱫᱟ ᱾ ᱱᱳᱝᱠᱟ ᱞᱮᱠᱟᱛᱮ ᱳᱱᱟ ᱛᱳᱞᱦᱟᱸᱴᱨᱮ ᱩᱱᱤᱭᱟᱜ ᱧᱩᱛᱩᱢ ᱰᱟᱢᱰᱟᱦᱮᱭᱮᱱᱛᱟᱭ ᱾ ᱦᱚᱲᱠᱳ ᱵᱟᱰᱟᱭᱠᱮᱫᱮᱭᱟ ᱟᱨ ᱩᱱᱤᱭᱟᱜ ᱟᱹᱭᱩᱨᱨᱮ ᱵᱷᱟᱹᱞᱟᱹᱭ ᱨᱮᱭᱟᱜ ᱵᱟᱹᱛᱤᱠᱳᱛᱮᱠᱳ ᱟᱨᱥᱟᱞᱮᱱᱟ ᱾ ᱦᱚᱲᱟᱜ ᱵᱤᱥᱣᱟᱹᱥ ᱦᱚᱸ ᱩᱱᱤᱨᱮ ᱰᱷᱮᱨ ᱤᱫᱤᱭᱮᱱᱛᱟᱠᱳᱣᱟ ᱟᱨ ᱩᱱᱤ ᱯᱟᱜᱧᱡᱟᱠᱳ ᱮᱦᱚᱵᱠᱮᱫᱟ ᱾ ᱨᱥᱯ ᱫᱚᱞᱨᱮᱱ ᱦᱚᱸ ᱩᱱᱤᱭᱟᱜ ᱠᱟᱹᱢᱤ ᱟᱨ ᱥᱟᱹᱨᱤ ᱟᱹᱜᱭᱩᱨ ᱜᱩᱱ ᱧᱮᱞᱛᱮ ᱟᱹᱰᱤᱠᱳ ᱢᱟᱱᱟᱣ ᱜᱟᱱᱟᱣᱠᱮᱫᱮᱭᱟ ᱟᱨᱠᱳ ᱥᱟᱨᱦᱟᱣᱠᱮᱫᱮᱭᱟ ᱾ ᱦᱚᱲᱠᱳ ᱥᱟᱞᱟᱜ ᱩᱱᱤᱭᱟᱜ ᱠᱟᱹᱢᱤ ᱠᱟᱹᱥᱱᱤ ᱟᱨ ᱩᱱᱤᱭᱟᱜ ᱱᱟᱯᱟᱭ ᱵᱮᱣᱦᱟᱨ ᱧᱮᱞᱛᱮ ᱨᱥᱯ ᱫᱚ ᱑᱙᱖᱒ ᱥᱟᱞᱨᱮ ᱵᱟᱪᱷᱱᱟᱣᱨᱮ ᱛᱮᱝᱜᱳᱜ ᱞᱟᱹᱜᱤᱫᱛᱮ ᱴᱤᱠᱤᱴᱮ ᱮᱢᱟᱣᱟᱫᱮᱭᱟ ᱟᱨ ᱟᱹᱰᱤ ᱦᱟᱢᱟᱞ ᱵᱷᱚᱹᱴᱛᱮ ᱯᱟᱹᱦᱤᱞ ᱫᱷᱟᱣᱨᱮᱜᱮᱭ ᱡᱤᱛᱟᱹᱣᱮᱱᱛᱮ ᱛᱳᱯᱳᱱ ᱣᱤᱫᱷᱟᱱ ᱥᱟᱵᱷᱟᱨᱮᱱ ᱢᱞᱟ ᱞᱮᱠᱟᱛᱮᱭ ᱵᱟᱪᱷᱟᱣᱮᱱᱟ᱾ ᱮᱢ.ᱮᱞ.ᱮ. ᱵᱟᱪᱷᱣᱮᱱ ᱛᱟᱭᱚᱢ ᱩᱱᱤᱭᱟᱜ ᱠᱟᱹᱢᱤ ᱫᱚ ᱟᱨ ᱦᱚᱸ ᱛᱟᱹᱯᱤᱥ ᱤᱫᱤᱭᱮᱱᱛᱟᱭᱟ ᱟᱨ ᱦᱚᱲ ᱦᱚᱯᱚᱱᱠᱳ ᱪᱷᱟᱰᱟ ᱮᱴᱟᱜ ᱡᱟᱹᱛᱠᱳ ᱛᱟᱞᱟᱨᱮ ᱟᱹᱰᱤ ᱢᱟᱹᱱᱟᱱ ᱞᱮᱠᱟᱛᱮ ᱳᱱᱠᱳᱣᱟᱜ ᱢᱚᱱᱮ ᱚᱱᱛᱚᱨᱨᱮ ᱜᱤᱨᱟᱹᱵᱟᱹᱥᱤᱭᱱᱟ᱾ ᱩᱱᱤᱭᱟᱜ ᱦᱚᱲᱠᱳ ᱞᱟᱹᱜᱤᱫ ᱨᱤᱠᱤᱲ ᱠᱟᱹᱢᱤ ᱧᱮᱞᱛᱮ ᱩᱱᱤ ᱫᱚ ᱟᱨ ᱦᱚᱸ ᱛᱳᱯᱳᱱ ᱣᱤᱫᱷᱟᱱ ᱥᱟᱵᱷᱟ ᱠᱷᱚᱱ ᱑᱙᱖᱗, ᱑᱙᱖᱙ ᱟᱨ ᱑᱙᱗᱗ᱨᱮ ᱮᱢ.ᱮᱞ.ᱮ. ᱞᱮᱠᱟᱛᱮᱭ ᱵᱟᱪᱷᱟᱣ ᱳᱪᱳᱞᱮᱱᱟ
ᱥᱟᱶᱦᱮᱸᱫ ᱡᱤᱭᱳᱱ:ᱼ
ᱢᱟᱱ ᱱᱟᱛᱷᱟᱱᱤᱭᱮᱞ ᱢᱩᱨᱢᱩ ᱫᱚ ᱪᱮᱫ ᱞᱮᱠᱟ ᱨᱟᱡᱟᱹᱨᱤ ᱫᱚᱞᱨᱮ ᱛᱟᱦᱮᱸᱠᱟᱛᱮ ᱦᱚᱲ ᱵᱷᱟᱹᱞᱟᱹᱭᱠᱳ ᱨᱮᱭᱟᱜᱼᱮ ᱠᱟᱹᱢᱤᱠᱮᱫᱟ ᱳᱱᱠᱟᱜᱮ ᱥᱟᱱᱛᱟᱞᱤ ᱥᱟᱶᱦᱮᱸᱫ ᱞᱟᱹᱜᱤᱫ ᱦᱚᱸ ᱟᱹᱰᱤ ᱡᱷᱩᱠᱮ ᱠᱟᱹᱢᱤᱭᱟᱠᱟᱫᱟ᱾ ᱠᱟᱹᱴᱤᱡ ᱩᱢᱮᱨ ᱨᱮᱜᱮ ᱥᱟᱱᱛᱟᱞᱤ ᱯᱟᱲᱦᱟᱣᱜ ᱟᱨ ᱚᱞᱚᱜᱼᱮ ᱪᱮᱫᱞᱮᱫᱛᱮ ᱯᱟᱹᱨᱥᱤ ᱥᱟᱶᱦᱮᱸᱫ ᱪᱮᱛᱟᱱᱨᱮ ᱟᱹᱰᱤ ᱠᱷᱟᱹᱱᱫᱽᱨᱤ ᱵᱟᱱᱟᱰᱟᱭ ᱟᱨ ᱫᱩᱞᱟᱹᱲ ᱛᱟᱦᱮᱸᱠᱟᱱᱛᱟᱭᱟ᱾ ᱩᱱᱤ ᱳᱞᱟᱜ ᱡᱮᱞᱮᱧ ᱡᱩᱰᱟᱹᱥᱤ ᱠᱟᱹᱦᱱᱤ "ᱚᱡᱚᱭ ᱜᱟᱰᱟ ᱰᱷᱤᱯᱨᱮ" ᱚᱱᱮ ᱳᱠᱟ ᱫᱚ ᱟᱡ ᱵᱟᱨ ᱜᱮᱞ ᱥᱮᱨᱢᱟ ᱩᱢᱮᱨᱨᱮᱭᱮ ᱚᱞᱞᱮᱫ, ᱡᱩᱫᱤ ᱳᱱᱟ ᱯᱩᱛᱷᱤ ᱡᱟᱸᱦᱟᱸᱭᱠᱳᱵᱳᱱ ᱯᱟᱲᱦᱟᱣᱟᱠᱟᱫᱠᱷᱟᱱ ᱛᱚᱵᱮᱵᱳᱱ ᱡᱳᱠᱷᱟ ᱛᱤᱭᱳᱜ ᱫᱟᱲᱮᱭᱟᱜᱼᱟ ᱡᱮ ᱩᱱᱤᱭᱟᱜ ᱥᱟᱵᱟᱫᱽ ᱜᱟᱵᱟᱱ ᱟᱨ ᱢᱚᱱ ᱜᱟᱲᱦᱟᱣ ᱠᱟᱹᱦᱱᱤ ᱚᱞᱚᱜ ᱨᱮᱭᱟᱜ ᱫᱷᱟᱨᱟ ᱫᱚ ᱛᱤᱱᱟᱹᱜ ᱥᱚᱨᱚᱥᱛᱟᱭᱟ᱾ ᱩᱱᱤᱭ ᱚᱞᱟᱠᱟᱫ ᱳᱱᱟ ᱜᱟᱢᱟᱢ ᱯᱩᱛᱷᱤ ᱞᱮᱠᱟ ᱥᱮᱹᱵᱮᱹᱞ ᱥᱚᱨᱚᱥ ᱫᱚ ᱟᱹᱣᱨᱤᱧ ᱯᱟᱲᱦᱟᱣ ᱛᱤᱭᱳᱜᱟ᱾
ᱪᱷᱟᱯᱟ ᱥᱚᱫᱚᱨ ᱯᱩᱛᱷᱤᱠᱳ:ᱼ
᱑. ᱚᱡᱚᱭ ᱜᱟᱰᱟ ᱰᱷᱤᱯᱨᱮ ᱑᱙᱔᱖ ᱨᱮ ᱚᱞ ᱥᱟᱹᱛ ᱟᱨ ᱑᱙᱙᱔ᱨᱮ ᱪᱷᱟᱯᱟ ᱥᱚᱫᱚᱨ
᱒. ᱥᱟᱱᱛᱟᱞᱤ ᱯᱟᱹᱨᱥᱤ ᱨᱮᱭᱟᱜ ᱛᱟᱭᱚᱢ ᱫᱟᱨᱟᱢ
᱓. ᱪᱳᱢᱢᱩᱱᱤᱥᱛ ᱤᱥᱛᱟᱦᱟᱨ
᱔. ᱟᱹᱱᱟᱹᱲᱤ ᱦᱚᱲ
᱕. ᱠᱟᱹᱠᱤ ᱜᱚᱜᱚ
᱖. ᱢᱟᱨᱛᱷᱟ ᱢᱟᱨᱭ
᱖. ᱵᱩᱨᱥᱤ ᱥᱮᱝᱜᱮᱞ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮ:ᱼ
᱑. ᱟᱨᱥᱟᱞ ᱼ ᱑᱙᱕᱕
᱒. ᱟᱲᱟᱝ ᱼ ᱑᱙᱖᱐
᱓. ᱥᱟᱨᱥᱟᱫᱟᱞᱮ ᱼ ᱑᱙᱖᱖
᱔. ᱡᱩᱜᱽᱥᱤᱨᱤᱡᱚᱞ ᱼ ᱑᱙᱗᱑
ᱥᱳᱢᱟᱡᱤᱭᱟᱹ ᱵᱟᱱᱟᱫᱷᱟᱣ ᱥᱟᱶ ᱡᱳᱲᱟᱣ:ᱼ
᱑. ᱡᱩᱜᱽ ᱟᱨᱥᱟᱞ ᱯᱟᱵᱽᱞᱤᱥᱤᱝ ᱠᱳᱢᱯᱟᱱᱤ
᱒. ᱳᱞᱞ ᱤᱱᱰᱤᱭᱟ ᱥᱟᱱᱛᱟᱞᱤ ᱞᱮᱝᱜᱽᱣᱮᱥᱴᱤᱠ ᱠᱳᱢᱤᱴᱤ
᱓. ᱫᱟᱹ ᱥᱟᱱᱛᱟᱞᱤ ᱞᱤᱴᱨᱮᱨᱤ ᱮᱱᱰ ᱠᱟᱞᱪᱨᱟᱞ ᱥᱳᱥᱟᱭᱴᱤ
᱔. ᱭᱩ.ᱮᱱ. ᱰᱟᱭᱵᱷᱳᱨ ᱠᱳᱢᱤᱥᱟᱹᱱ
᱕. ᱥᱟᱱᱛᱟᱞᱤ ᱥᱤᱞᱮᱵᱟᱹᱥ ᱠᱳᱢᱤᱴᱤ ᱣᱮᱥᱴ ᱟᱝᱜᱟᱞ
᱖. ᱠᱟᱞᱠᱟᱹᱛᱟ ᱥᱮᱱᱟᱴ ᱢᱮᱢᱵᱟᱹᱨ
᱗. ᱱᱳᱨᱛᱷ ᱵᱟᱝᱜᱟᱞ ᱴᱨᱟᱱᱥᱯᱳᱨᱴ ᱠᱳᱨᱯᱳᱨᱮᱥᱟᱹᱱ
᱘. ᱣᱤᱥᱣᱟ ᱵᱷᱟᱨᱛᱤ ᱭᱩᱱᱤᱵᱷᱟᱨᱥᱤᱴᱤ ᱥᱟᱱᱛᱤᱱᱤᱠᱮᱛᱟᱱ ᱮᱜᱽᱢᱤᱱᱟᱹᱨ
ᱩᱱᱤᱭᱟᱜ ᱟᱹᱭᱩᱨᱛᱮ ᱮᱦᱚᱵᱞᱮᱱ ᱠᱟᱹᱢᱤ ᱦᱳᱨᱟᱠᱳ:ᱼ
᱑. ᱨᱟᱱᱟᱡᱚᱴ ᱢᱟᱸᱦᱟᱸ ᱼ ᱑᱙᱕᱕,
ᱵᱮᱞᱛᱟᱲᱟ ᱯᱟᱹᱪᱷᱤᱢ ᱫᱤᱱᱟᱡᱽᱯᱩᱨ ᱣᱮ.ᱵᱟᱝ.
᱒. ᱤᱱᱴᱟᱹᱨᱱᱮᱥᱱᱟᱹᱞ ᱥᱟᱱᱛᱟᱞᱤ ᱥᱮᱢᱤᱱᱟᱨ ᱼ ᱑᱙᱖᱑, ᱵᱟᱞᱩᱨᱜᱷᱟᱴ ᱣᱮ. ᱵᱟᱝ.
᱓. ᱳᱞᱞ ᱤᱱᱰᱤᱭᱟ ᱥᱟᱱᱛᱟᱞᱤ ᱥᱮᱢᱤᱱᱟᱨ ᱼ ᱑᱙᱗᱐, ᱵᱟᱞᱩᱨᱜᱷᱟᱴ ᱣᱮ. ᱵᱟᱝ.
᱔. ᱳᱞᱞ ᱤᱱᱰᱤᱭᱟ ᱥᱟᱱᱛᱟᱞᱤ ᱥᱮᱢᱤᱱᱟᱨ ᱼ ᱑᱙᱗᱑, ᱫᱩᱢᱠᱟ ᱡᱤᱞᱟ ᱥᱠᱩᱞ, ᱡᱷ.
᱕. ᱤᱱᱴᱟᱹᱨ ᱥᱴᱮᱴ ᱥᱟᱱᱛᱟᱞᱤ ᱥᱮᱢᱤᱱᱟᱨ ᱼ ᱑᱙ᱼ᱒᱑ ᱡᱟᱱᱩᱣᱟᱨᱭ ᱑᱙᱗᱓, ᱨᱟᱡᱽ ᱦᱤᱜᱷ ᱥᱪᱷᱩᱞ ᱯᱟᱠᱩᱲ ᱡᱷ.
᱖. ᱯᱤ.ᱳ. ᱵᱳᱰᱤᱜ ᱡᱟᱱᱟᱢ ᱵᱟᱹᱪᱷᱲᱤ ᱼ᱑᱙᱗᱕ ᱠᱳᱞᱠᱟᱛᱟ ᱣᱮ. ᱵᱟᱝ.
᱗. ᱨᱟᱱᱟᱡᱚᱴ ᱢᱟᱸᱦᱟᱸ ᱼ ᱓᱐ ᱡᱩᱱᱮ ᱑᱙᱗᱘, ᱠᱳᱞᱠᱟᱛᱟ ᱣᱮ. ᱵᱟᱝ.
ᱥᱤᱨᱳᱯᱟ:ᱼ ᱜᱩᱱᱤᱡᱚᱱ ᱥᱚᱢᱵᱚᱨᱫᱷᱳᱱᱟ ᱑᱙᱘᱙ ᱾
